Bidasoa Irun Malagara itzuliko da asteazken honetan Trops Málagaren aurka jokatzeko Errege Kopako Bigarren Kanporaketari dagokion norgehiagokan (Colegio Los Olivos, 20:30ean). Irungo taldea horrela itzuliko da hiriburu andaluziarrera, Puleva Maristasen aurka azkenekoz 24-29 irabazi zuen azken neurketatik 27 urtera.
Málagako talde desagertuaren aurkako lehia haiek 90eko hamarkadako lehen erdiko ohiko norgehiagoka bihurtu ziren, eta txokolateroek 10 garaipen eskuratu zituzten, berdinketa bat eta beste porrot bat, Málagako lurraldeetara egindako lehen bisitan jazotakoa (24-23), 1990/1991 denboraldiko B multzoko azken jardunaldian, talde bidasotarra titulurako faserako behin sailkatuta zegoelarik.
Bost denboralditan jokatutako hamar Ligako partida horiei (1990/1991-1994/1995) Kopako hiru norgehiagoka gehitu behar zaizkie, eta ASOBAL Kopako beste bat. Lehenengo biak 1988/1989 denboraldiko Kopako aurrekanporaketan izan ziren. Bi taldeek 26na berdindu zuten Málagan eta Elgorriaga Bidasoak 23-21 irabazi zuen Irunen. Bidasoak Málagako talde baten aurka jokatu zuen azken aldia Ciudad Realen antolatu zen 1994/1995 Errege Kopan izan zen. Final-laurdenetan, talde gipuzkoarrak 26-25 Puleva Maristasi irabazi zion Malagóneko egoitza neutralean. ASOBAL Kopari dagokionez, Elgorriaga Bidasoak mendean hartu zuen Puleva Maristas (30-28) 1993. urteko finalerdian, finalean Teka Cantabriari irabazi eta egun duen ASOBAL Kopa lortuta.
Bidasoaren eta Málagaren arteko harremana, hala ere, urte batzuk lehenago hasi zen, Errege Kopako lehen finala jokatu zuen hiria izan baitzen. Zehazki, 1982/1983 denboraldian. Urte hartan ere ibili zen estreinekoz Kopako Fase Nagusi batean. Bere ibilbidean hiru aurkari historiko izan zituen: Michelin Valladolid (30-28), Cajamadrid (25-16) eta FC Barcelona (16-36).
