Bidasoa Irunek garaipen garrantzitsua lortu du asteari amaiera jartzeko Pontevedran Cisne mendean hartu eta gero (19-28). Lehen zatia berdintasunaren bidetik hasi arren, talde bidasotarrak defentsa estutu duen momentutik, Harbaoui Mehdi atepeko lanean asmatuz, airea hartu du eta abantaila gutxinaka zabaltzen joan da. 6-4 galtzetik (8. minutuan) 8-11ra pasa da 2-7 harmar minututan landutako partzial on bati esker. Atsedenaldira bidean, galiziarrek bi hutsarte eskatu dituzte, neurketaren norabidea iraultzea lortu gabe (11-18).
Sorpresarik nahi ez, eta Jacobo Cuétarak entrenatzen duen taldeak erritmoari eutsi dio. Formula berretsiz, defentsa sendo eta atepean Mehdi disdiratsu, tartea irekitzen joan da talde bidasotarra, gaurkoan min hartuta dauden Rodrigo Salinas eta Víctor Rodríguez gabe. Martxa horretan, hamar goleko errenta lortu du 48. minutuan Mihajlo Miticen eskutik, amaiera lasaiera bermatuz (19-28).
Bidasotarren hurrengo neurketa Errege Kopakoa izango da, datorren asteazkenean Andaluzian, Trops Málagaren aurka (Colegio Los Olivos, 20:30ean). Plenitude ASOBAL Liga, berriz, larunbatean Artalekun du hitzordua: Helvetia Anaitasuna mendean hartu zuenetik bi aste eta etxetik kanpo hiru neurketa jokatu eta gero, irundarrak etxean arituko dira, kasu honetan, Blendio Sinfínen arerio dutelarik (16:00etan).
Fitxa teknikoa
19 – Club Cisne BM. (11+8). Santana, Franceschetti (3), Álvarez (3), Furtado (3), Pombo, Chan (5, 1 p.), Arias (1); Franzini, Dani López, Vázquez, Diego López, Chapela (2), De Moura, Ocaña (1), Lorenzo, Conde.
28 – Bidasoa Irun (18+10). Mehdi, Gey-Emparan (2), Mitic (1), Francisco da Silva, Tesoriere (1), Asier Nieto (5), García (2); Skrzyniarz, Cavero (5, 4 p.), Ugarte (2), Zabala (3), Furundarena, Aginagalde, Mujika (4), Azkue (2), Gorka Nieto (1).
Partzialak. 2-2, 6-5, 6-7, 9-12, 11-15, 11-18; 12-20, 15-22, 15-24, 15-25, 17-27, 19-28.
Epaileak. Hoz Fernández eta Riloba Pereda. Cisneren aldetik, Pombo, Ocaña, Álvarez, eta Márquez entrenatzailea zigortu dituzte bi minutuz. Bidasoa Irunen aldetik, García, Tesoriere (2) eta Mitic.
Bestelakorik. Plenitude ASOBAL Ligako 9. jardunaldiko neurketa, Pontevedrako Pavillón Municipal dos Deportes-en jokatua, 300 bat zaleren aurrean.
