Bidasoa Irunek aste honetan ospatuko den eta aurten 27. edizioa beteko duen Egiako Nazioarteko Txapelketan parte hartuko du. Irungo taldeaz gain, uda honetan Balonmano Logroño La Rioja eta Frantziako Ligako Limoges Hand 87 taldeek hartuko dute parte.
Txapelketa ostegun honetan hasiko da Egiako ohiko agertokian, irundarren eta errioxarren arteko norgehiagokarekin, 19: 30etik aurrera, eta Jacobo Cuétarak entrenatzen duen taldeak larunbatean, ordu berean, Alberto Entrerríosek eta bidasotarren atezain izandako José Manuel Sierrak zuzentzen duten taldearen aurka izango du bigarren lagunartekoa.
Gurutz Aginagalde C.D. Bidasoako presidenteak Donostiako Udaletxean astearte honetan egin den aurkezpenean parte hartu du, eta bertan adierazi du “Egiako Nazioarteko Txapelketak garrantzi handia duela bai Bidasoa Irunentzat, bai Gipuzkoako eta Euskadiko eskubaloiarentzat. Europa mailan udaro txapelketa gehiago eta indartsuagoak dauden garai honetan, 27. ediziorako prest dagoen Torneoa mantendu ahal izateak asko eta ondo hitz egiten du bere antolatzaileei buruz eta babesten duten erakundeei buruz”.
“Aurkari handien aurkako bi neurketa dira. Alde batetik, ezer gutxi deskubritu behar dugun Logroño; eta bestetik, Limoges, Frantziako Ligan jauzi txiki bat emateko proiektu bat prestatzen ari dena. Gure prestakuntzan ondo etorriko zaizkigun bi partida izango dira”, Aginagaldek azaldu duenez, eta aitortu du “denboraldi honetan denboraldi-aurrearen konfigurazioak, gainera, Gipuzkoan jokatuko dugun lehen partida Donostian izatea eragin duela. Hori dela eta, ziur aski, Aste Nagusian bertan eta pandemiaren ondoren, Donostiako, Irungo eta Gipuzkoako bidasotar zale asko animatuko dira”.
Egutegia:
- Abuztuaren 18an, osteguna, 19: 30ean: Bidasoa Irun-BM. Logroño La Rioja.
- Abuztuaren 19an, ostirala, 19:30ean: BM. Logroño La Rioja-Limoges Hand 87.
- Abuztuaren 20an, larunbata, 19:30ean: Bidasoa Irun-Limoges Hand 87.
