Bidasoa Irunek Fraikin BM. Granollers izango du aurkari Sacyr ASOBAL Kopako finalerdian, Zaragozako Príncipe Felipe Jauregian jokatuko dena datorren ekainak 4 eta 5ean. Aragoiko hiriburuko udaletxeko Harrera Aretoan ospatu den zozketan Julen Aginagalde izan da klubeko ordezkari. Bidasoa Irun zozketa-buru izan da Barçarekin batera hamargarrenez jokatuko duen Ligako Kopan, laugarrena segidan. 1992/1993 denboraldian irabazi zuen, eta txapeldunorde izan da 1991/1992, 2018/2019 eta 2019/2020.
Zozketaren emaitza jakinda, Aginagalderen esanetan, “hoberen iristen den taldeak” irabaziko du txapelketa: “Guk ilusio osoz prestatuko dugu Kopa, finalera iristeko gogoekin”. Era berean, zaletuak animatu ditu Zaragozara bertaratu daitezela: “Gure zalegoak asko bultzatzen gaitu bai Artalekun, bai Irundik urrun. Oso eskertuak gaude eta ea asteburu polit bat eskaintzerik dugun”. Abonuak salgai daude El Corte Ingléseko web orrialdean, eta ASOBALek abantailak iragarri ditu lau talde parte-hartzaileen bazkideentzat.
Aurreko norgehiagoketan, Bidasoa Irunek hiru aldiz jokatu du txapelketa honetan talde katalanaren aurka:
1993/1994 (Alcobendas)
Finalerdia: BM. Granollers 26-24 Elgorriaga Bidasoa.
1994/1995 (Vigo)
Finalerdia: BM. Granollers 19-18 Elgorriaga Bidasoa.
2018/2019 (Lleida)
Finalerdia: Fraikin BM. Granollers 25-30 Bidasoa Irun.
Sacyr ASOBAL Minikopa
Sacyr ASOBAL Koparekin batera, La Granja kiroldegian Sacyr ASOBAL Minikopa jokatuko da. BM Zaisa Bidasoa Irun taldeari A multzoa egokitu zaio, BM. Logroño La Rioja, BM. Dominicos eta Moncayo Casablanca. B Multzoan, berriz, KH-7 BM. Granollers, BM. Huesca Lasaosa eta BM. Almogávar.
