Bidasoa Irunek “neurketa oso zaila” izango du larunbat honetan 12: 00etan Palau Blaugranan, ez bakarrik Barça liderra aurrean egongo delako, baizik eta lehen taldearen lesioek markatuta datorrelako.
Norgehiagoka honetarako lehen eta bigarren taldeen artean lanean dabilen gazte taldera Asier Iribar zumaiarra gehituko da, Gorka Nieto, Eneko Furundarena, Julen Urruzola eta Julen Mujikarekin batera, Sacyr ASOBAL Ligan debuta egiteko aukera izanda. Jacobo Cuétara entrenatzailearen ustez, helburu nagusietako bat “esperientzia lortzea da, mundu guztiak ezin baitu esan Barçaren aurka jokatzen duela Palaun, eta etorkizunerako balio behar digu”.
Prestatzaile bidasotarrak “penatuta” dagoela aitortu du, Jon Azkueren eta Rodrigo Salinasen lesioek eta Adrian Fernández eta Julen Aginagalderen zuhurtziaz etxean geldituta, Ligako lehia historikoetako bat nabarmen baldintzatzen dutelako: “Lehen itzulikoak ere pena eman zidan, oso baldintzatuta baikeunden, baina sentsazio oso onak hartu genituen, Barçaren aurka azken unera arte oso norgehiagoka duina jokatuz. Zaleak pozez zoratzen zeuden, lehen aldia baitzen hainbeste gazte aldi berean ikusten zutela, eta Barça baten aurka lehiatzen”.
Cuétarak gaineratu duenez, “oso esperientzia garrantzitsuak dira haientzat”, eta azpimarratu du “lehen taldean erabilgarri dauden gazteen ehunekoa oso handia da orain; beraz, taldetxo hori hobetzea lortzen badugu, talde osoak hobera egingo du”.
Hala ere, “zuhurtziaz ibiltzeko” deia egin du: “Horrelako partidekin kontuz ibili behar dugulako: neurketa asko ditugu epe laburrean, eta ez dut taldea suizidatuko”.
Norgehiagoka larunbat honetan jokatuko da 12: 00etan Palau Blaugranan eta Gol TVk emango du zuzenean.
