“Zaleen aparteko babesa behar dugu”

“Zailtasun oso, oso, oso handiko partida da, eta zaleek ematen diguten plus aparteko horren beharra izango dugu”. Jacobo Cuétara Bidasoa Irun taldeko entrenatzailearen ustez, taldeak Fenix Toulouse HBren aurka neurketa handia du astearte honetan Artalekun (20: 45ean): “Europako neurketa handia da eta taldea dinamika onean iristen da”.

Cuétarak “oso partida europarra” espero du, “ikusgarria, defentsa oso gogorrekin baina kontraeraso erritmo handiarekin. Frantziako taldeek asko korritzen dute, gu ere korrika ari gara, baina, batez ere, oso ondo ari gara korritzen. Kontraerasoko gol dezente sartzen ari gara, beste denboraldi batzuetan baino gehiago. Gehiago korritu ahal izateko prestatu dugu aurten taldea, bai, baina eraginkortasun indize oso, oso altuarekin gaude, eta hori garrantzitsua da taldearentzat. Oso lehia polita izango da, Europako txapelketetan ikusten den horietakoa, defentsa gogorrekin eta kontraeraso nahikoarekin”.

“Europako neurketek mundu guztia motibatzen dute. Oso zentratuta gaude Ligan, klubarentzat eta guretzat oso garrantzitsua baita, baina Europako txapelketa oso gehigarri garrantzitsua da”, adierazi du prestatzaile bidasotarrak Fenix Toulouse HB jaso atarian: “Frantziako Ligako onenen artean dagoen taldea da, eta horregatik dago hemen, eta hain da zaila Europako postuetan sartzea. Taldearen zati handi bat mantentzen du, desoreka asko eragin dezaketen jokalariak dituzte, hala nola Abdi edo Erik Balenciaga edo Feuchtmann eta Petterson, suediar internazionala. Maila hori dute Frantziako Ligan urtez urte gorenean egoteko”.

Okzitaniako taldeak Füchse Berlin eta Orlen Wisła Płock aurkako bi partidekin hasi du Europako ibilbidea: “Bajekin ere, puntuak lortzeko aukerekin egon dira, eta, beraz, dituzten zero puntuak ez dira esanguratsuak”. Cuétarak azaldu duenez, “gure aurrekontua lau aldiz duen kluba da, eta hori hitz handiak dira, baina badakigu edonoren aurka lehiatu gaitezkeela, eta partida ona eginez gero, eta batez ere etxean, gerra handia eman dezakegula”.

Entrenatzaile bidasotarraren ustez, partidaren gako bat oso garrantzitsua izango da: “Artaleku lehertzea. Gure alde egiteko eta animatzeko neurketa da, zaleen aparteko hori behar dugulako. Hurrengo bi jardunaldiak garrantzitsuak dira eta zaleen plusa behar dugu. Bihar taldeaz, daraman martxaz, European Leagueaz, lehiatzen ari garen moduaz eta Toulouseri irabazteko balentria egiten gozatzeko eta saiatzeko eguna da”.

“Ziur nago lehiakorrak izango garela eta partida irabaziko dugula, baina oso zaila da, oso, oso zaila, eta zaleei plus hori eta emango digun estra horren beharra izango dugu”, adierazi du Cuétarak: “EHF European Leagueko A multzoan maila altua dago, eta honaino iristea oso zaila da. Garrantzitsuena gure partida ondo egitea eta lehiakorrak izatea da. Lortzen badugu, momentuz izaten ari garen bezala, puntuak lortzen joango dira”.