Jacobo Cuétara Bidasoa Iruneko entrenatzailearen ustez, igande honetan Liberbank Cantabria Sinfinen aurka jokatuko duten partidari begira, helburu nagusia “aspalditik esaten ari garen bezala, bi puntuak batzea da, ez du axola noren aurka, bi puntuak soilik”. Igandeko neurketako atarikoan entrenatzaile bidasotarrak ohartarazi duenez, “gauden momentuan egonda aurkari guztiak arriskutsuak izan daitezke, eta horrela ari gara planteatzen. Garrantzitsuena bi puntuak lortzea da”.
“Denboraldi amaierara arte dugun beste final bat jokatuko dugu, gero eta gutxiago geratzen da eta ondo kokatuta gaude”, esan du Cuétarak, baina ohartarazi du ezin dela jakin “nork jarri ahal dizkigun gauzak zail. Liberbank Cantabria Sinfinen aurka jokatuko dugu, bi garaipen jarraian eta Abanca Ademar Leoni irabazi ondoren. Orain aurkari guztiak arriskutsuak izan daitezke eta horrela ari gara planteatzen. Garrantzitsuena bi puntuak lortzea da”.
Bidasoa Iruneko entrenatzaileak espero du talde bidasotarrak “hasieratik maila ematea, defentsan sendo eta eroso egotea, hori izan baitaiteke gure arma nagusia, Santanderren egon ginen bezala, oso ondo erasotu genuen, baina oso ondo hasi ginen defentsan, eta horrek lasaitasun handia eman zigun”.
Cuetararen ustez, sendotasun hori “puntu diferentzial nagusia izan daiteke” Liberbank Cantabria Sinfinen aurkako partida batean. Arerioaz galdetuta, zentralaren eta pibotearen arteko lotura azpimarratzeaz gain, beste faktore batzuk ere nabarmendu ditu: “Ostroushkoren fitxaketarekin, iaz Eurofarm Rabotnikekin sufritu genuenarekin, jaurtiketa indartsua ere badute, eta gauza gehiago ere badituzte. Defentsa gogorra dute, oso ondo dabilen atezain batekin. Beste batzuetan zailtasunetan sartu gaituzte, eta saihestu egin behar dugu. Irabazteko armak dituzte, Abanca Ademar Leonen aurka asteazkenean erakutsi zuten bezala”.
Bidasoa Irunek porrota jaso zuen asteartean Barçaren aurka Palau Blaugranan. “Momentu onean gaudela baieztatzen digu neurketa hark, goi mailako eskubaloia joka dezakegula erakusten du eta eskubaloi ona eta emaitza onak lortzeko bidean jarraitzen dugula. Azken txanpan sentsazio horiek izatea garrantzitsua da, joko onean jarraitzeko, inolako desfaserik gabe “, laburbildu du Cuétarak, eta neurketa hura ondo etorri dela esan du, “Mikel Zabala eta Iñaki Cavero bezalako jokalarientzat, oso ongi ibili baitziren zaila zen partida batean. Gure jokalari askori duten maila berresten lagundu behar die”. Neurketa igande honetan Artalekun jokatuko da eguerdiko 12:00etan ateak itxita, Eusko Jaurlaritzaren LABI batzordeak horrela ebatzita.
Harrobiko zuzendari tekniko berria
Borja Burguete lehen taldeko bigarren entrenatzailea harrobiko zuzendari tekniko izendatu berri dutela eta, kazetariei erantzunez balorazioa eskaini du bidasotarren entrenatzaileak: “Zuzendaritza batzordeak zalantzarik gabe asmatu du Borjaren hautaketarekin. Pertsona guztiz prestatua da, haziz doana, karguak eskatzen duena betetzeko izaera perfektua du, %100 positiboa baita: arazo bat dagoenean, berak azkar bilatzen du konponbidea. Oso prestatuta dago eta eskarmentua du. Ezin hobea da, etxekoa da, gero eta funtzio gehiago hartuko ditu eta klubaren ondare izan behar duela uste dut”.
Bere ustez, “harrobirako garrantzitsua da eraikitzen joatea, sendoagoa izateko pausoak ematen joatea eta Bidasoa eskola bat sortzea, etorkizunean jokalariak prestatzeko modu hori. Gure azentua eman behar diogu, eta oso pozik nago bete-betean asmatu delako”.
